أيام المدرسة 1

بسم الله الرحمن الرحيم
السلام عليكم ورحمة الله و بركاته
كيفكم؟ أخباركم؟
أنا راح أسرد لكم بعض مقالبي بالمدرسة
و أتمنى إنها تعجبكم طبعا راح أحاول أجيب مقلب لكل سنة دراسية
أوكي؟ يلا نبدأ
الروضة:
طبعاً أنا عندي حب الإستطلاع بشكل غريييب المهم طلعت من صفي ورحت أتمشى بالأسياب
و دخلت الحمام المهم لقيت الأبواب مسكرة قلت ليش ما أفتحها؟ و فعلا بدأت المهمة فتحت كل الأبواب ما عدا باب كان مقفل عاد أنا كبر براسي<<< عارفين عناد أطفال
المهم والله جتني فكرة تدرون إيش هي؟
إني أروح الحمام المفتوح اللي بجانب المقفل عشان
أركب على المرحاض<<<أكرمكم الله
و أطل على الحمام المقفل
طبعاً هو مقفل لأن فيه بنت
أنا ما كنت أدري أحسب أن الفراشة مسكرته عشان فيه شي <<< لقافة
و فعلاً طبقت الخطة و طليت ولقيت بنت
طبعا عارفين أنتم الوضعية بدون ما أشرحها صح؟
قالت لي بكل براءة: روحي و لا راح أعلم عليك الأستاذة
قلت لها : كيف تعلمينها؟
عاد هي استحت
قلت لها و يملأني الجبروت:أنتي ما قدرتي تقولين لي عشان تقدرين تقولين للأستاذة
هي عاد قامت تصيح
و أنا قمت أقهرها و أضحك بعدين هربت
الصف الأول:
عارفين أول سنة و كل الأطفال يصيحون
اللي تبي تنام
و اللي عارفة وقت توم وجيري و تبي تشوفهم
و اللي تبي أمها
ووحدة خايفة بس مدري ليش؟ <<يمكن شايفة معلمة و مرعبتها ههههه
طبعا و كالعادة أنا على عكس البشرية تدرون وش سويت؟
رحت بكل بساطة و جلست على الكرسي حقي و ساكتة
و قعدت أشوف كل هالدراما قدامي وخذ لك ضحك مو طبيعي<<<لاحظوا هذا أول يوم
وحدة تبكي
ووحدة ترتجف
ووحدة فجرت المدرسة من الصراخ ما تبي أمها تروح
و أكثر شي ضحكت عليه بنت جيراننا
لأنها كانت تقولي: لا تخافين يا moon soon ترى المدرسة حلوة
و طبعا أهلها قالوا لها هالكلام وجت تتفلسف علي ههههههههه
المهم خلصت الدراما بعد جهد من المعلمات
عاد رحت بالبريك(الفسحة) و فريت المدرسة <<< لاحظوا ما زلت في أول يوم
فاصل:
أول كنت جريئة <<<الله يرحم أيام أول
ألحين لو تقولون أقعدي بغرفة لحالك و نسكرها عليك شوي كان ما قعدت هههههه
عدنا:
المهم لاحظت بعد وقت و أنا طبعا أتمشى أن البنات قلوا و خفت الأسياب <<طبعا أنتم عارفين أن البريك ما يتعدى 20 دقيقة
و أنا من زود الذكاء توقعت الناس يتمشون إلى ما يشبعون ههههههههههههههه
المهم خفت و شكيت و حسيت إن فيه شي غلط

و فجأة تظهر لي معلمة من بين خلق الله وقالت لي: ليش تدورين بالممرات؟
عاد أنا رديت عليها و دموعي خلاص بتطلع: ضيعت فصلي؟
قالت : أنتي بأي صف؟
قلت لها: صف أول.
عاد أستغربت المعلمة من أول يوم و أول ترم و أول فصل طلعت شطانتي هههههههه
المهم راحت تعرضني على الفصول زي الغنم اللي ماحد يبي يشتريها و طبعا أنا مستحية مووت
الحمد لله لقيت فصلي ولا قمت أطلع منه أخاف أضيع
الصف الثاني:
طبعا أنا ألحين ماخذه على جو المدرسة و عارفة البنات و المدرسات و من أكثر المواقف اللي تتكرر
تقريبا كل يوم إني ما أنام بدري طبعا مو تقصير من أمي بالعكس تقولي روحي نامي
عاد أنا أتشيطن و لا يبين علي شي كأني رايحة أنام و بمجرد ما تنام أمي أروح التلفزيون و أتابع برامج مالها داعي كنت أكرهها بس مدري ليش أتابعها طبعا كنت أنام عند التلفزيون<<ذكاء صح؟
عاد أمي على طول تكتشف أني كنت سهرانة عليه و تروح تعطيني الهوشة الثلاث تسعين ألف بعد المليون
المهم عاد عرفت أضبط الحركة كنت أروح التلفزيون و إذا نعست رحت لغرفتي و نمت و بكذا ما صارت تكتشفني إلا قليل<<عقل مدبر منذ الصغر قولوا ما شاء الله ههههههههه
و صرت أغلب الأيام أنام الساعة 1 أو 2
طبعا أمي تقومني عااادي و أروح المدرسة مع بابيتو<<< دلع أبوي هههه ومازلت أناديه يا داد يا بابيتو أتميلح لعل و عسى يعطيني الشي اللي أبيه ههههههه
و إذا دخلت المدرسة أتسلل و ما أدخل الطابور تنفعني ربع ساعة نوم وما أحس إلا و المعلمة تقومني ومن الذكاء إني قاعدة قدام يعني أكيد راح تشوفني
و في أثناء ما قومتني التيتشر جرت المحادثة التالية:
تيتشر:قومي يا moon soon؟
أنا: شوي شوي <<<على بالي أمي
قالت: قومي يا شطورة ودي أبدا الدرس.
قلت لها: ما تفهميييين أبنام أبنااااااام أصبري شوي أبو اللقافة<<<بزرة تبي تنام هههه
عاد هي طفشت و عصبت قالت: قومي ولا أنقصك؟
قلت: أووووف طيب
عاد بيني و بين نفسي أقول:الله ياخذ أم اللزقات عليهم طفيش غريييب.
الصف الثالث:
كان علينا كلاس فراغ المهم المدرسة حطت عريفة.
فاصل:
العريفة: هي مصطلح يطلق على البنت التي تخبر المعلمة من التي قامت باعاثة الفوضى و شخبطت على السبورة وهناك مصطلح آخر لنفس المعنى وهو (دبوسة) أو (fax).
عدنا:
العريفة طبعا ما تقدر تسكتنا إلا بطريقة وااحدة سحرية ألا و هي donkey game
راح تسألون إيش هاللعبة؟
أنا أجاوبكم: تقول لنا العريفة: اللي يتكلم ألحين نسميه حمار.
طبعا حنا أطفال و تمشي علينا هالحركات ولا تسمع ولاهمسة بعد الجملة هذيك.ههههههههه
مرة فلتت مني كلمة بالغلط طبعا كالعادة بسبب لقافتي الفطرية
قلت: أحد تكلم؟
و بصوت واحد صرخوا: أنتي حمااااااااااااااارة أنتي أول وحدة تكلمتي.
إلا صار وجهي أحمررررر
و بعدين حرمت أتكلم بحصص الفراغ.
الصف الرابع:
من هنا بدأت المعاناة مع الإختبارات النصفية و النهائية و التاريخ و الجغرافيا.......etc
المهم تم نبوغي بمادة الرياضيات بهذه المرحلة يعني أول كنت شاطرة بالرياضيات بس مو بالشكل هذا
قولوا ما شاء الله
قالت المعلمة مرة : مين الذكية اللي تقولي إيش القاسم المشترك بين العدد 8 و 11غير العدد 1؟
عاد طبعا كل البنات جاوبوا غلط اللي تقول 2 و وحدة تقول 3
المهم فكر شوي و رفعت يدي بتردد فالت المعلمة:قومي
قلت: لا يوجد قاسم مشترك
قالت: ممتازة مريني بعد الفسحة أبعطيك هدية
عاد أنا قمت أكشخ و ما أرد على كل بنت هذاك الوقت أغتريت و قلت : أنا عبقرية و أنا مدري؟
المهم مرت الفسحة و رحت لها و عطتني طقم إكسسوار و لبسته أول ما وصلت الفصل و صادروه مني الإدارة يقولون: هذا ممنوع<<<طبعا هذا عذرهم الوحيد ههههه
الصف الخامس:
كان العصر الذهبي لي من ناحية الدراسة صرت الأولى في كل الإختبارات و كرموني كطالبة مثالية
عاد تعرفون ما يمشون مع بعض الشطارة و المزح فأعذروني ما تذكرت شي.
للحديث بقية بس تعبت ودي آخذ بريك
وأتمنى الموضوع عجبكم و أتمنى ألقى التفاعل اللي أنا أتمناه
يتبع
برب